Iñake Irastorzak jaso du Ohorezko Besarkada saria, "interpretazioari bizitza oso bat eskaintzeagatik", antolatzaileen esanetan. Beste sarituak Nagore Aranburu, Arnatz Puertas, Patricia Lopez Arnaiz, Jose Ramon Soroiz, Ainara Gurrutxaga eta Kepa Errasti izan dira. Hain zuzen, Yune Nogueirasekin batera, bi hautagai debagoiendarretako bat zen aretxabaletarra.
Desobedienteak 18/98 antzezlanean egindako interpretazioagatik jaso du antzerkiko gizonezko aktore onenaren saria Errastik, eta bigarren urtez jarraian jaso du aitortza hori. Gainera, Hodei Arrastoarekin batera, bigarren urtez zuzendu du ekitaldia aretxabaletarrak, gidoia egitearekin batera.
Izen handiak irabazleen artean
Talentu berria aitortzea helburu duten errebelazio saria Nerea Sanzek eta Omar Somaik jaso dituzte. Fikziozko seriatuen atalean, Nagore Aranbururentzat izan da Emakumezko Aktore Onenaren saria eta Arnatz Puertasentzat, berriz, Gizonezko Aktore Onenarena. Zineman, Patricia Lopez Arnaizek eta Jose Ramon Soroizek irabazi dituzte aktore onenen sariak. Antzerkian, azkenik, Errastirekin batera, Ainara Gurrutxagarentzat izan da Emakumezko Aktore Onenaren saria.
