Aretxabaletako Basotxo erretiratuen elkarteak Aste Kulturalari hasiera eman zion atzo, astelehena, Uretz lorategian antolatutako jolasekin. Elkarteko kideek arratsalde atsegina igaro zuten dokean, tokan, igel-jokoan eta makila-jokoan arituta. Jolasetan trebetasuna erakusteko aukera izan zuten parte-hartzaileek, eta tiratzaile onenek garaikurra ere jaso zuten.
Aste osorako egitaraua
Basotxoren Aste Kulturalak egubakoitzera arte jarraituko du. Datozen egunetan ibilaldi osasungarria, hitzaldia, Lodosa eta Calahorrara irteera, Mutiko Kristalen horma-irudiak ezagutzeko bisita gidatua eta barre-terapia tailerra egingo dituzte, besteak beste. Egubakoitzean, hilak 30, elkarteko taldeen dantza eta kantu emanaldiekin amaituko dute egitaraua, Karmele Igartua aretoan.
