Itsaso Pagoaga eta Katalin Antxia Aretxabaletako landa-eremuko emakumeekin harremanetan jartzen hasi dira, Zintak proiektuan haien bizipenak eta jakintza jasotzeko. Adin guztietako emakumeen testigantzak bildu nahi dituzte herriko bederatzi baserri-auzoetan. Garai bateko baserriko bizimodua izango dute hizpide: eguneroko lanak, gauzak aprobetxatzeko eta berrerabiltzeko moduak eta, bereziki, jantziekin lotutako oroitzapenak. Emakume bakoitzarekin tertulia giroko elkarrizketa bat egitea da asmoa, haren bizipenak eta oroitzapenak jasotzeko.
Baserrietako memoria
Zintak egitasmoak Aretxabaletako lehen proiektu feministen sormen beka jaso zuen. Baserrietako jantzi zaharretatik tomate-landareak lotzeko ateratzen ziren oihal-zintak ditu abiapuntu, emakumeen lanari, zaintzari, bizimoduari eta belaunaldiz belaunaldi transmititutako jakintzari erreparatzeko. Parte hartu nahi dutenak Itsaso Pagoagarekin edo Katalin Antxiarekin jar daitezke harremanetan, baita atxabaltakozinttak@gmail.com helbidera idatzita ere. Bildutako testigantzak proiektuaren parte izango dira, eta azken emaitza 2027ko irailean aurkeztuko dute.
