Obrari ekiteko gertatze lanetan jardungo dute astelehenean, hau da, itxiturak jartzen hasiko dira. Bost hilabete iraungo dute lan horiek eta maiatzean amaitzea aurreikusi du Udalak. Lur Paisajistak –Iñigo Segurola eta Jon Muñiz–enpresak egingo ditu eta horretarako Udalak egin duen inbertsioa da 573.661 eurokoa.
Aretxabaletako Udalaren esanetan proiektuaren helburua da berdegune hori "aisialdirako gune moderno eta jasangarria" bihurtzea. 3.969 metro koadro ditu eremu horrek eta lau eremu bereizi egongo dira han: ur-jolasen parkea –sakonerarik gabe– haur eta gazteei bideratuta; atsedenlekua, mahaiekin; jolas librerako gune zabala; eta komun autogarbigarria. Gaineratu dute landaketa berriak egingo direla paisaia hobetzeko.
