Orain dela bi urte arrakasta izandakoak errepikatzea erabaki du batzordeak Korrika Aretxabaletatik pasatuko den egunerako, martxoaren 28rako: goiz partean, Korrika Txikia ikastetxeetako umeen eskutik; kontzertuak iluntze partean; eta Zuk in, zuk jan afaria gauean. Egitarau hori osatzen joango dira datozen asteetan.
Era berean, Korrika kulturalaren baitako egitaraua zehazten hasita dago Udaleko Kultura Saila. Horren baitan, Kaka antzezlana iritsiko da Arkupera, martxoaren 22an; AEK-Korrikako II. Kultur Sorkuntza Beka irabazi zuen lan horrek eta gidoigileen artean Kepa Errasti Gorroño aretxabaletarra dago. Beste hainbat ekitaldi ere izango direla iragarri dute.
Hurrengo batzarra urtarrilaren 26ean egingo du batzordeak, 18:00etan, udaletxe zaharrean. Ateak irekita dituzte parte hartu gura duen edonorentzat.