Etenik gabe erre dituzte edukiontziak Aretxabaletan, aste barruan zein asteburutan; azken zazpi egunetan, esaterako herriko bi guneri eman diete su: Andramari auzunekoari hilaren 3an eta Ilargi plazakoari, 9an. Udal Gobernu Taldetik jakinarazi dute guztira hamabost edukiontzi-sute izan direla aurten, 53 edukiontzi errez. Eta kalteak are gehiago: "Espaloietan, errepideetan, edukiontzien euskarrietan, zuhaitzetan, argiteria publikoan. Eta arriskua sortu dute, inguruko ibilgailu eta etxebizitzentzat". Egoera horrek "haserrea, ezintasuna eta segurtasun falta eragin ditu herritarren artean", eta Udal Gobernuak ere partekatzen du hori.
"Zentzugabeko ekintza horiek" irmoki gaitzetsi dituzte: "Gure herriaren bizikidetzaren aurka egiten dutelako eta kalte egiten dietelako Aretxabaletako herritarrei. Izan ere, ondasun komunak kaltetzeaz gain, zerbitzu publikoen baliabideak murrizten dituzte". Eta azken bost urteetan edukiontziak erretzeak izan duen kostuarekin finantzatu ahalko liratekeenak aipatu dituzte: Andramari eta San Migel jaiak antolatu, ia sei hilabeteko etxez etxeko arreta-zerbitzua eskaini (6.000 ordu), kirol elkarteen dirulaguntzak bi urtez bideratu edo sei hilabeteko kale-garbiketa zerbitzua ordaindu.
Komunitatearen lankidetza
Udalak dituen "baliabide guztiak" jarri dituztela martxan hasieratik adierazi dute prentsa-oharrean: "Eta etengabeko lankidetza mantentzen du Ertzaintzarekin, Aretxabaletako segurtasun publikoaren arduradun baita ekintza hauek gertatu diren uneetan".
Lanean jarraituko dutela gaineratu dute, "eskuragarri dauden zerbitzu guztien koordinazioa sustatuz" egoerari amaiera emateko: "Azpimarratu nahi dugu ekintza hauek Aretxabaletaren eta herritarren aurka egiten dutela, eta horiei aurre egiteko ezinbestekoa dela komunitate osoaren lankidetza".