Aldarrikapen eta ondo pasatzeko eguna zuten atzo Aretxabaletako Harro Egunean, eguerdi aldera atera ziren kalera eta Harro bira-ren ostean, bazkaria egin zuten. Aurten, gainera, bazkalostean irakurri zuten pregoia, eta karaokean parte hartzeko aukera ere izan zuten.
Atxabalta Harro taldeko kide Beñat Arizabaletak egunaren balorazio positiboa egin du. Adierazi duenez, 50 lagun elkartu ziren bazkarian, eta aurrez egindako Harro bira-n ere jendea batu zen: "Giro oso-oso polita egon zen eta gure espektatibak gainditu genituen". Gainera, azaldu duenez, pregoia bazkal ondoren eginda, jende gehiagorengana heldu zen mezua, eta "harrera oso ona" izan zuen.
Dena den, dio kontziente direla Aretxabaletan "lan handia" dagoela egiteko: "Kaletik begiradak eta barreak ikusten ditugu, baina erronka moduan hartzen dugu. Lanean jarraituko dugu. Ez da bide erraza izango, baina ez dugu amore emango".