Mondragon Unibertsitateko Humanitate eta Hezkuntza Zientzien Fakultateak jazarpenaren eta ziberjazarpenaren prebentzioari buruzko jardunaldia antolatu zuen joan den astelehenerako, Bilbon. Jardunaldia gamifikazioaren –jokoak dituen tresnen, dinamiken eta mekaniken erabilera egitea jokoekin zerikusirik ez duten jardueretarako– eta metabertsoaren bidez egin zuten. Gainera, Ciberproxy proiektua biribiltzeko balio izan zuen.
Ciberproxy proiektua
Mondragon Unibertsitateko Humanitate eta Hezkuntza Zientzien Fakultateko KoLaborategiko STEM eta Digitalizazio arloko bi ikerlarik parte hartu dute parte proiektuan: Amaia Arroyo Sagastak eta Egoitz De La Iglesia Ganboak. Koordinazio lana, berriz, UDEM unibertsitatetik eraman dute.
Proiektuaren helburua jazarpena eta ziberjazarpena prebenitzea da, eta, horretarako, lau profil hartu dira kontuan: ikasleak, irakasleak, familiak eta agintariak. Kasu guztientzat ihes-gelak diseinatu dira metabertsoan –errealitate birtuala–, baina horrek aurrelanketa bat eskatu du; profil bakoitzarentzat materiala garatzeko, hurbileko jazarpena zein ziberjazarpena prebenitzeko eta tratatzeko beharrezkoak diren gaitasunen mapatzea egitea, gamifikazioa erabiliz.
Horrekin lortzen dutena zera da, teoriatik ikasi beharrean murgiltze-esperientzia gidatu batetik ikastea, bizi esperientzia hipotetiko bat simulatuz. Proiektu horrek, gainera, jazarpen-kasuak prebenitzeko eta tratatzeko beharrezkoak diren jarrerei eta gaitasunei buruz hausnartzeko balio du.
Erronkak eta prebentzioa
Ziberjazarpenari aurre egitea da erronka, baina, horretarako, zer den ulertu behar da, nerabeen testuinguru soziala ezagutu, jazarpenean parte hartzen duten rol guztiak ulertzen saiatu, baita horiek kudeatzeko konfiantzazko guneak sortu ere.
Konpetentzia digitala babes-tresna bat izan daiteke, prebentziorako giltza. Era berean, heziketa jasotzea ezinbestekoa da gailuen eta teknologien ongizatean oinarritutako erabilera arduratsua eta segurua egiteko.