Ate-joka dago 54.ez datorren Gipuzkoako bola-txapelketa, eta UDA Hirutxirlo taldeko bola-jokalariek ez dute hutsik egingo. Datorren eguenean ekingo diete entrenamendu-saioei, denboraldia prestatzeko.
Lau talde Gipuzkoakoan
Bola-jokorako zaletasunaren bueltan elkartutako hainbat herritarrek orain dela sei urte sortu zuten taldea, eta 2023an UDAren familiara batu zen. Aretxabaletako jokalariekin batera Eskoriatzakoak eta Aramaiokoak ere badaude, eta arrasatearren bat edo beste ere bai. "Iaz, asko indartu zen taldea, eta, aurten baja batzuk izan baditugu ere, indartsu dago, eta denboraldiari ekiteko gertu", adierazi du Gorka Madinabeitia kideak. Aurtengo txapelketara bost lagunez osatutako lau talde aurkeztuko dituzte.
Erronkarik ez dute ezarri, baina emaitza onak eskuratzea beti da pozgarria: "Taldekako sailkapenean hiru lehenen artean gutako bat izatea ona litzateke. Eta banakako sailkapenean lehenengo hamarren artean baten bat sartzea, pozgarria". Gazte eta infantil mailetan, ostera, samurragoa izango dela dio: "Parte-hartzea txikia izaten da. Guk bi kide ditugu, eta iaz, esaterako, Axel Sixto txapelduna izan zen infantilen artean".
Gipuzkoako txapelketari martxoaren 15ean ekingo diote, Soraluzeko San Andres bolatokian, eta finala ekainaren 7an izango da, Azkoitiko Floreagan. Hamaika saioetatik lau jokatuko dira Debagoienean: martxoaren 29an, Bergaran; eta maiatzean beste hirurak: 17an, Aretxabaletan; 24an, Elgetan; eta 31n, Leintz Gatzagan. Euskal Herriko 35. Txapelketa, ostera, udazkenean iritsiko da, eta urrian eta azaroan izango dira jaurtialdiak.
Aretxabaletako txapelketa
Aretxabaletan jokatuko diren txapelketekin ere sailkapen bat osatuko dute. Zazpi-zortzi izango dira guztira, eta lehenengoa izan zen otsailaren 22koa. Horregatik, hango irabazle Haizea Arrieta dago sailkapenaren buruan. Puntu gehien eskuratutakoa hautatuko dute bolari onena urte bukaeran, eta 200 euro eta txapela jasoko ditu. Hurrengo txapelketa martxoaren 8an izango da, Uratz Aldek antolatuta.
