II. Jabetze Eskolaren egitaraua abiatuko du Udaleko Berdintasun Sailak. Bergaran bizi den Luciana Alfaroren hitzaldia hautatu dute horretarako: Descentrando miradas: introducción al feminismo de(s)colonial para transformar luchas locales. Feminismo de(s)kolonialaren oinarriak azaltzeaz gain, feminismo eurozentrikoari egingo dio kritika; bereziki, "emakumeen esperientziak unibertsalizatzeko joerari", horrek "arrazismoa, kapitalismoa eta beste botere-egitura batzuk ikusezin" bihurtzen dituela iritzita. Otsailaren 19an izango da, 18:00etan, Arkupeko bigarren solairuan.
Tailerretako izen-ematea zabalik dago
Hitzaldiez gain, tailerrak ere izango dira Jabetze Eskolaren baitan: Hilekoaren zikloa berrezagutzen, martxoan; Boterea, ahizpatasuna, perreoa, maiatzean; eta Produktu erotikoak ezagutzen, ekainean. Horietarako, aldez aurretik eman behar da izena: berdintasuna@aretxabaleta.eus. Horretarako azken eguna otsailaren 28a da.
