Iluntzeko kalejiraren ostean, ospakizuna borobiltzeko, Akulu eta Oihu taldeen kontzertuak izan ziren Kixkor tabernan, eta DJak Urbaltzen –DJ Session–, Izotzen –Techno Party– eta Ezkutun –Alex TC & Inshore Live & Javier HO & Sdietz & Zianu–.
Bolotan Nerea Lete garaile
Goizean, bola-txapelketan giro ederra izan zuten Kanuto Deunaren Egunera batu zirenek. Aretxabaletako bolatokian batu, salda hartu eta jokoan aritu ziren, zenbait lagun txapelketa hasi arte. Gero, lehia izan zen, eta parte hartu zuten hemezortzi lagunetatik Nerea Lete gailendu zen, sei txirlo botata; sari bakarra txapela izanda, berak eraman zuen.
Balorazio positiboa
Aretxabaletako San Kanuto Egunaren antolakuntza taldeko kide Jon Antiak azaldu zuenez oso ondo pasatu zuten eguna. "Guztira, hemezortzi lagun inguru aritu dira bola-txapelketa jokoan, aurreikusi baino gutxiago, baina, primeran aritu gara, eta, parte-hartzaile guztiei eskerrak eman beharrean gaude. 10:30etan batuta, txapa jokoan aritu ginen lehenbizi, eta, 12:00etan hasi genuen txapelketa; Nerea Letek ganoraz irabazi zuen sei txirlo botata. Gero, zerbait hartu eta bazkaria egin genuen Taberna Berrin eta ondoren festa pixka bat Orkestra Elektrotunarekin…".
San Kanuto aldarean alderik-alde
Kalejira izan ohi da eguneko ekintza azpimarragarriena, eta, beste hainbat ediziotan moduan Orkestra Elektrotuna taldeko musikari bizkaitarrek lagunduta egin zuten. Aurtengo hogeitabosgarren edizioan ez da astorik izan kalejiran, baina, San Kanuto aldarean eraman zuten alde-batetik bestera, bide batez, kalamuaren legalizazioa eskatuz.
