Andramari egunean ohitura da udalbatza meza nagusira joatea, txistulariek jotako Alkate soinu-ak lagunduta. Hala ere, aurten, Udal gobernuak ekitaldi instituzional hori bertan behera uztea erabaki du. Aretxabaletako EAJren udal taldeari ez zaio ondo iruditu erabaki hau, eta are gutxiago jakinarazpena "ekitaldi programa argitaratu aurrean" eman izana. "Ez gatoz bat hartutako erabakiarekin baina are gutxiago erabakia hartzeko moduarekin", adierazi du udal taldeak ohar baten bidez.
Ekitaldia "Aretxabaletaren parte" dela adierazi dute jeltzaleek, eta "horrelako erabaki bat hartzea" herritarrei dagokiela. Hauen ustez, horrelako erabakiak udalbatza osatzen duten alderdien eta gobernatzen dagoen taldearen "gainetik" daude. Bide horretatik, "erabaki hori herritarrekin partekatua izan dadila" eskatu diote udal gobernuari.
