Biolur elkarteak, Aretxabaletako Udalaren eta Euskadiko Nekazaritza eta elikadura ekologikoaren kontseiluarekin lankidetzan, elikagai ekologikoen azoka antolatu du beste urte batez. Hamabost ekoizle izango dira Durana kaleko azokan, gehienak,
Gipuzkoakoak, baina Bizkaitik, Nafarroatik, Iparraldetik eta Errioxatik ere etorriko dira. Barazkiak eta frutak, ardi eta behi-gazta, eztia eta ogia izango dira, baita Falcesko berakatzak, Zamudioko arrain kontserbak eta Itsasuko piperrak ere, besteak beste.
Gainera, nekazaritza eta elikadura ekologikoari buruzko informazio-panelak eta Biolur elkartearen informazio puntua ere izango dira bertan bisitarientzako. Hain zuzen ere Biolurren iritziz herritar asko biltzen den topagunea da Aretxabaletakoa: "Zuzenean ekoizleen eskutik elikagaiak eskuratzeko aukera herritarrei eskaintzea beti da garrantzitsua, baina baita ere ekoizleak kaleetan egoteak sektoreak egiten duen lana erakusteko balio duelako. Beraz, aurten ere herritarrak animatzen ditugu gerturatu, dastatu eta zuzenean ekoizleei erostera". Eta gaineratu dute: "Bizitzen ari garen garai nahasi hauetan, eredu ekologikoan urrats sendoak ematea ezinbestekoa da, ekoizpenetik kontsumorainoko bidean, sektorearen iraunkortasuna eta ingurumena eta pertsonen osasuna erdigunean jarri nahi baditugu behintzat".
Artisauak ere bai
Artisauek ere ez dute hutsik egingo eta 35 inguru elkartuko dira eskaintzeko, besteak beste, bitxiak, kandela eta xaboi naturalak, lore lehorrak, bitxiak, larruarekin egindako oinetakoak eta buztinezko ontziak; hain zuzen ere, buztina lantzeko tailerra egongo da Herriko Plazan.
Ikastetxeek, Kurtzebarri eskolak eta Arizmendi ikastolak, ere jarriko dituzte postuak.
Ganadua, Arlutzeko kantxan
Ganaduak bere tokia izango du Arlutz osteko kantxan. Bost ganaduzalek ekarriko dituzte bertako arrazako animaliak, besteak beste, behi piriniotarrak eta terreña behiak, pottokak, euskal mendi behorrak, ahuntz azpigorriak, sasi-ardiak eta ardi latxak.
