Entzute handiko Kukai dantza taldearen buru den Jon Maya Sein elkartu da Cesc Gelabert koreografoarekin eta dantza tradizionaletan ohikoak diren hainbat kontzeptu berraztertu dituzte proiektu honetan, begirada pertsonal berri batetik. Hala sortu da Gelajauziak eta bihar, eguaztena, Alain Maya, Eneko Gil, Ibon Huarte, Jon Maya, Nerea Vesga eta Urko Mitxelena dantzariek Herriko Plazan eskainiko dute (19:30).
Bigarren diskoa aurkeztuko du Nhil taldeak
Egubakoitzean, ostera, etxeko taldearen txanda izango da. Nhil osatzen duten sei gazteek –Asel Errasti, Xabi Zuazabeitia, Aitor Ruiz de Austri aretxabaletarrak, Beñat Arrieta eskoriatzarra, Sara Alonso aramaioarra eta Lia Garai arrasatearra– Bizi bagina bezala bigarren lana aurkeztuko dute.
Emozioetatik idazten dutela adierazi dute eta hori da diskoan dauden letren oinarria; barne gatazkak eta bizitzaren oreka bilatzearen prozesu konstantea dute iturri letra horiek. Bederatzi abestik osatzen dute diskoa; horietatik, sei dira ingelesez eta hiru euskaraz. Eta dagoeneko bi bideoklip kaleratu dituzte: Dance eta Bilatzen oreka.
Taldearen bigarren diskoa ezagutu gura dutenek edo kontzertuarekin gozatu hilaren 22an dute aukera Santa Ritako lorategian (19:00).