Nihil taldeak "oreka bilatzearen prozesu konstantean murgiltzea" eskaini nahi dio entzuleari Bizi bagina bezala lan berrian. Azaldu dute bizitzaren errutinak eta monotoniak askotan "helburuen bidetik desbideratzen" dituela pertsonak, eta horren aurrean "gorputzak eta buruak lekuz aldatzea, bestelako bizitza erritmo batean murgiltzea" eskatzen diela gogoak. "Hala ere, gehienetan ezinezkoa izaten da eta hori da amildegiaren ertzean gaudela sentitzen dugun momentua, gainezka egiten dugun momentua eta zulo beltza ukitzen dugun unea", esan dute.
Lanaren barruan kolaborazio berezia egin dutela aurreratu dute. Abesti bat konposatzen hasi bezain laster Lide Hernando gogora ekartzen zien zerbait zuela sumatu zuten, eta Hernandoren ahotsa izan behar zuela erabaki zuten: "Kantuaren melodiak, koloreak eta erritmoak Lideren ahotsarekin modu oso naturalean egin du bat eta emaitza borobila izan da". Bideokliparen irudiak BBB diskoaren aurkezpen kontzertuan jasotakoak dira; Beñat Abasolok egin ditu grabaketa eta edizio lanak.
Hurrengo kontzertuak
- Legazpi: uztailak 15 - Karibe Zaharra
- Irun: uztailak 17 - Ehiera Plaza
- Aretxabaleta: uztailak 22 - Mojetako jardina
- Iruñea: urriak 8- Rockollection aretoa