Ospitaleak emandako materiala Senegalera bidaltzeko laguntza eskatu du Yaakar elkarteak

Debagoieneko Ospitaleak emandako oheak, mahaitxoak, besaulkiak, ekografiak egiteko makina eta beste hainbat altzari eta babes-material jaso ditu Aretxabaletako Yaakar elkarteak; horiek bidali ahal izateko diru-bilketa kanpaina jarri dute abian.

Lankidetza proiektu bat du martxan Aretxabaletako Yaakar elkarteak Senegalgo Mbam herrian; hango osasun zentroan erditze eta kontsulta gelak eraiki dituzte azken urtean. Horiek hornitzeko materiala jaso dute orain, dohaintzan, eta hori bidaltzeko diru-bilketa kanpainari ekin diote.

Diru-batze kanpaina

2019az geroztik lanean diharduten Yaakar elkarteko kideak pozik agertu dira Debagoieneko Ospitaletik jaso duten materialarekin: ospitaleko lau ohe, lau mahaitxo, bi besaulki, lau ohatila finko, ohatila hidrauliko bat, ekografiak egiteko makina, bestelako hainbat altzari eta babes materiala; besteak beste, mantal berrerabilgarriak. "Dohaintza horrek herriko emakumeen bizitzara hobekuntza handia ekarriko du, haurdunaldian eta erditzeko orduan laguntza eskainiz, eta haurren heriotza-tasa murriztuko du", azaldu dute elkarteko kideek.

Material hori Senegalera zelan bidali da orain erronka: "Hori guztia Mbam udalerriko osasun etxera eramateko edukiontzi bat ordaindu behar da, eta gastu horri aurre egiteko kanpaina bat abiarazi dugu". Ordainketak bi eratara egin daitezke: Bizum aplikazioan sartuta: klik egin Dohaintza –Eman– botoian eta Yaakar Aretxabaletako elkartea bilatu; edo banketxe-transferentzia bidez, zenbaki honetan: ES60 3035 0002 16 0020077455 –Laboral Kutxa–. Gainera, maiatzaren 28an, Txakolin Egunean, kalean ere izango direla dirua jasotzen jakinarazi dute: "Dohaintza guztiak dira ondoetorriak!".

Emakumeendako arreta

Senegalgo hego-mendebaldean, Fatick eskualdean eta Foundiougne departamenduan dago Yaakarrek abian duen proiektua, eta Aretxabaleta, Bergara eta Eskoriatzako udalen eta Mbam herriko eragileen laguntzarekin eraiki du amatasun-kontsulta.
"Proiektuaren helburu nagusia
da larrialdiko obstetrizia-arreta eta jaioberriena hobetzea; izan ere, Mbam udalerriak ez du instalazio egokirik amaren eta jaioberriaren osasuna bermatzeko", adierazi dute eta aurrez aurre dituzten erronken berri eman: amaren heriotza-tasa murriztea; arreta medikoa jasotzeko aukera bermatzea, bereziki populazio ahulenei eta nekazari-ingurukoei; kalitatezko osasun publikoko zerbitzua lortzea; eta osasun plan baten bidez bertako osasun sistema hobetzea.

Uztailean Aretxabaletako ordezkaritza bat joatea hara bisitan da asmoa, egindakoen berri bertatik bertara jasotzeko.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.