Aretxabaleta kirol elkartearen 75. urteurrenak Zuhaitz Egunarekin egin du bat, eta, Udalarekin eskutik, hamabost zuhaitz landatuko dituzte domekan. Herriko bi gunetan izango da landaketa, Otala Zelain eta Ibarra futbol zelai inguruan; jardun horretara, futbol eskolako neska mutikoez gain, herritar guztiak gonbidatu dituzte.
Haritza futbol zelaiko sarreran
Hamabi landatuko dituzte futbol zelai inguruan: likidanbar espezieko bederatzi kimu, urki bat eta aligustre bat. Baita haritz bat ere sarreran, 16-18 zentimetro inguruko zirkunferentziaduna; berezia izango da hori, urteurrenari egingo diolako keinu.
Aozaratzako zelai ezagunean,ostera, beste hiru haritzi egingo diete lekua. Horrela, usteldutako batzuk ordezkatuko dituzte, bertako basoak iraun dezan. Lanak bukatutakoan, mokadutxoa eskainiko diete elkartutakoei.
