Amets Arzallus bertsolariak idatzitako mezua eramaten du kutxak, eta euskal nortasuna biziarazteko helburua du ekimenak. Hala, Aretxabaletako Kurtzebarri eskolara 10:00etan iritsiko da, eta Loramendi euskara elkartera 17:30ean.
Ongietorri ekitaldia, eskolan
Kurtzebarri eskolako zuzendaritzak esan du harrera estua egingo diotela: "Eskolan egitarau bat prestatu dugu Kutxa bira-ri harrera egiteko. Lehenengo, eskolako nagusiek, LHko 4, 5, eta 6. mailetakoek, ongietorria egingo diote. Eskolako Herensuge-ek eta Eguzkiloreak-ek kutxa ekarriko dute, eta ondoren, seigarren mailako hiru ikaslek kutxa barruan datorren Amets Arzallusek idatzitako manifestua irakurriko dute eta gainontzeko ikasleek eskolako dantza dantzatuko dute. Amaitzeko, gela bakoitzeko ikasle batek euren euskararekiko aldarria irakurriko du, eta kutxan sartu. Berdina egingo da 10:10ean LHko 1, 2 eta 3. mailetakoekin; eta, azkenik, eskolako gazteenek, 11:00 inguruan, Haur Hezkuntzakoek, borobil baten dantza egin eta euren mezuak kutxara bideratuko dituzte".
Eguraldi kaxkarra bada, frontoian egingo dute harrera ekitaldia, eta egitarauan ere aldaketak egingo dituztela adierazi dute; hainbat kontu aldatuko dira. "Garrantzitsuena segurtasuna bermatuz denok momentu atsegina bizitzea izango da, kutxa bira-ri ongietorri ona egin eta euskararen aldarria Aretxabaletako gure ikasleei eta Kurtzebarriko hezkuntza komunitateari zabaltzea", adierazi dute Kurtzebarritik.
Euskara elkartean geldiunea
Goizean Kurtzebarri eskolakoek harrera egin ostean, arratsaldean Loramendi Euskara Elkartekoek egingo diote harrera kutxari. Herriko Plazan egingo dute ekitaldia, eta herriko beste zenbait elkarte eta eragile batuko dira ongietorri ekitaldira: "Ekitaldi xumea egingo dugu. Ludotekakoek, hizkuntza errefortzuko haurrek, musika eskolako dantza talde batek, bertso eskolakoek eta Basabeazpikoek hartuko dute parte bertan. Amets Arzallusen testua irakurtzeaz batera, dantza ere izango da, eta batzen garenon eragile bakoitzeko arduradun batek gure amets edo aldarria irakurriko du, eta kutxara sartu", adierazi du Ainhoa Sanchezek, Loramendi Euskara Elkarteko arduradunak.
