Aretxabaleta eremu gorritik atera zen atzo, eguena, intzidentzia-tasa 451,98 izanik –14 egunetako tasa 100.000 biztanleko– eta, ondorioz, ostalaritza zerbitzuek zabaltzeko aukera izango dute gaur. Datua jaso orduko bilera egin zuten ostalariek atzo eguerdian, eta gehienak agertu ziren zabaltzearen alde. Hala ere, "ziurgabetasun handiaren" aurrean, ostalariek oso kezkatuta jarraitzen dute.
Gabonetako galerak
Ia bi hilabete egin dituzte itxita, azaroaren 7tik abenduaren 12a bitartean lehenengo, eta ondoren, abenduaren 18tik atzo arte. Hala, Gabonetan ez dute zabaltzeko aukerarik izan, eta hori "galera handia" izan da, Orly tabernako Igor Ezkibelek dioenez: "Gabonetan jasotzen den dirua oso garrantzitsua da, gero maiatz inguru arte irauteko. Aratuste-domeka salbuespen izanik, gainerakoan, maiatzera arteko hilabeteak behe denboraldia dira". Dagda tabernako Nerian Perezek berretsi egin du hori: "Jendea oporretan egoten da Gabonetan, eta hilabete oso polita izaten da negoziorako".
Zabaltzeko aukeraren aurrean zalantzak izan dituzte ostalariek: "Hiru egunerako bakarrik ez nuke zabalduko. Eta baldintzak jakinda; 18:00etarako itxi behar izanez gero ez dudalako negoziorik, eta gastuak, ostera, bai", dio Ezkibelek, eta Perezek gaineratu du: "Bost langile ditut nik, eta ondo pentsatu beharko nuke noiz zabaldu. Oraingoan, uste dut aurrera egingo dudala".
Ia bi hilabete izan dituzte ateak itxita eta askok erabaki dute gaur zabaltzea. Dena den, oso kezkatuta jarraitzen dutela adierazi du Ezkibelek: "Asko daude larri eta urduri; gainera, Udalaren laguntzak oraindik ez dira iritsi. Ez dakigu noiz arte iraungo duen egoerak, eta horrek urduritasuna areagotu egiten du".
Elkarretaratzea gaur
Egoeraren berri emateko eta erreskate plan bat eskatzeko hainbat ekitaldi egin dituzte azken egunetan, eta horiekin jarraitzeko asmoa agertu dute; gaur, egubakoitza, Herriko Plazan elkartuko dira, 20:00etan.
Gainera, astelehenean, Euskadiko ostalariek egindako deialdiarekin bat egin eta Lakuara, Gasteizera, joango dira: "Gure eskaerak eramango dizkiegu". Hain zuzen, egun horretan elkartuko da LABI, neurri gehiago hartu edo ez erabakitzeko.