Bihar, zapatua, giza katea egingo du Aretxabaletako Sarek, Izan Bidea ekimenaren baitan. 18:30ean hasita, Portasolgo autobus geltokitik irten eta Herriko Plazarainoko bidea egingo dute bertan batzen direnek. Presoen aferan konponbide bat lortzeko asmotan egin du giza katerako deialdia Aretxabaletako Sarek. Besteak beste, salbuespen legedia bertan behera uztea eskatuko dute.
Sareko kideek azpimarratu dutenez, osasun neurriak "zorrotz" beteko dituzte katea egiteko, eta, dena behar bezala bermatzeko, 15-20 boluntario inguru ariko direla lanean adierazi dute. Hori horrela, giza katea hiru zutabetan joango dela jakinarazi dute, eta parte hartzaileen artean bi metroko distantzia mantenduko dutela gaineratu, parte-hartzaileei lasaitasun mezua helarazteko asmoz.