Ohorezko Erregional mailako taldeak bi multzotan banatuta hasi dute asteburuan liga, eta, Ibarra futbol zelaian neurri zorrotzak ezarrita ireki dituzte ateak. Ikusleek tenperatura hartu behar izan dute instalazioetara sartzeko, eta, harmailetan segurtasun distantziak mantenduz ikusi behar izan dute partidua.
Berdinketa azken unean
Otazuren golarekin hasi da partidua, baina, mutrikuarrek hiru gol sartu dizkiete, gero. Mikel Ezeizak sartu du UDAren bigarren gola, eta, markagailuan 2-3 jarri ostean, Unai Cebrinok sartu du hirugarrena, azken jokaldian. Argi ikusi da jokalariek futbol partidua jokatzeko gogoz zeudela, eta, zaletuek ere hori transmititu dute. Hala, bi taldeak paretsu arituta, emaitza justua izan dela adierazi dute jokalariek. Unai Cebrino hirugarren golegileak halaxe adierazi moduan: "Oso ondo hasi gara. Lehenengo gola azkar sartu dugu, baina, beraiena iritsi denean pixka bat kostatu zaigu markagailuari buelta ematea. Sekula baino partidu gehiago jokatu ditugu denboraldiaurrean eta luzea izan da itxaronaldia. Hasteko gogoz geunden. Berdinketarekin puntu bat lortu dugu, partidu lehiatsuaren ostean, beraz, gustura geratu gara emaitzarekin.
Bergarak irabazi, Aloñak galdu
Bergarak, berriz, Eibar Urkoren aurka jokatu du partidua Agorrosinen. Aurkari gogora izan duten arren, 2-1 irabazi dute partidua. Aloña Mendik, aldiz, Elgoibarren jokatu du partidua. Kasu honetan, baina, 2-0 amaituta, puntu barik bueltatu behar izan dira etxera. Mondrak, berriz, atsedenaldia izan du ligako lehenengo jardunaldian.
