Gizadi enpresako langileak dira elkartu direnak eta ELAko ordezkariak azaldu du horren berririk ez dutela: "Langileek egoera prekarioan jarraitzen dute. Eta enpresaren eta Udalaren aldetik ez dugu jaso erantzunik". 2016tik daudela inolako hobekuntzarik izan barik eta dagoeneko hiru urte daramatzatela negoziatzen gaineratu du Janire Diaz Jauregik.
Udalari eskatu diote "arduraz jokatzeko", herritarrei eskaintzen dieten zerbitzua delako eta "diru publikoarekin finantzatua". Eta enpresa salatu dute langileen osasuna erabiltzen dutelako aitzakia gatazkari irtenbidea ez topatzeko.
COVID-19aren ondorioz lan karga are eta handiagoa dela adierazi dute, eta gogorarazi dute langile asko 50 urtetik gorako emakumeak direla. Hori horrela, lan baldintza hobeak eskatu dituzte: "Soldata duinak, bajak %100 estalita eta osasuna bermatuko duten neurriak".
Era berean, zerbitzu publikoa izan beharko litzatekeela etxez etxekoa eta ez azpikontratatutakoa gaineratu du ELAko Diaz Jauregik.
