Aste honetan, martitzenean, hain zuzen ere, zabaldu dute Basotxoko taberna. Abuztuaren 1etik zegoen itxita, eta erabiltzaileek eskertu egin dute: "Juani Fabian arduraduna ausartu egin da zabaltzera, Udalak begi onez ikusi du eta zuzendaritza batzordekook gure babesa adierazi diogu", jakinarazi du Pedro Etxebarriak. Opor ostea luzatzea erabaki zuen Fabianek, erabiltzaile kopurua asko murriztu zela ikusita. "Ekainaren 1ean zabaldu genuen konfinamendu ostean eta beherakada handia izan genuen; %100 beteta izatetik %20-10 ingurura jaitsi ginen. Beldur handia antzeman genuen, eta ulertzekoa da, arrisku taldeko erabiltzaileak dira eta", dio Fabianek. Ezarritako protokoloa zorrotz betetzen dute tabernan eta lasai gerturatzera gonbidatu ditu erretiratuak: "Mahaien arteko espazioa zaintzen dugu, garbitasuna… Ea jendea animatzen den". Ateak egun osoan ditu irekita: astelehenetik egubakoitzera 08:00etatik 21:00etara eta zapatu eta jaiegunetan 10:00etatik 21:00etara.
Bidaiarik eta saiorik oraindik ez
Elkarteko presidente Aitor Alberdik ere onartu du beldurra dagoela erretiratuen artean: "Bidaiak antola ditzakegu, eta, gainera, oso merke daude orain, baina jendea ez dago horren zain". Ikastaro eta hitzaldiei dagokienez ez da halakorik egingo, oraingoz, eta San Migelen bueltan antolatu izan duten kultura asterik ere ez da egongo.
Aretxabaleta Lagunkoia
Uztailean berritu zen Basotxoko zuzendaritza batzordea, baina ez dago geldi; datorren astelehenean, hilaren 21ean, esaterako, batzarra du. "Aurrera begirako kontuak zelan antolatu zehaztu gura ditugu; bereziki, Aretxabaleta Lagunkoia taldea", dio Etxebarriak, eta gaineratu du: "Diagnostikoaren berrikusketa bukatu dugu eta udaletxean aurkeztuta daukagu horren gaineko hausnarketarekin jarraitzeko". Hala, eguenean, hilaren 24an elkartuko dira berriro udal ordezkariekin: "Martxoan egiteke utzi genuenari heltzea da asmoa, eta etorkizunean zelan egin jarraipena zehaztea".