133 hautagaik aurkeztu zituzten proiektuak lehiaketara, eta horietatik zazpi ikastetxe, bi unibertsitate, bi elkarte eta Zientzia, Teknologia eta Berrikuntzaren Euskal Sareko eragile bat daude finalean; tartean, Aretxabaletako Kurtzebarri eskola, ortu ekologiko zientifikoa izeneko proiektuarekin.
Urrian banatuko dira sariak, eta zehazki lau emango dituzte: unibertsitateaz kanpoko ikastetxeek sustatutako ekimen berritzaileena; gainerako erakundeek sustatutako ekimen berritzaileena; unibertsitateaz kanpoko ikastetxeek genero ikuspegiarekin sustatutako ekimen onena; eta, gainerako erakundeek genero ikuspegiarekin sustatutako ekimen onena.
Sustatzaileen arabera, ikasleen prestakuntza zientifiko-teknologikoa "hobetzea" da ekimenaren helburua, neskei "arreta berezia" jarrita: “Arlo horretako jardunbide egokienak ikusaraztea eta aintzat hartzea da xedea, bai haien eraginagatik eta berrikuntza-mailagatik, bai neskak, gazteak eta emakumeak diziplina horietara erakartzeko duten gaitasunagatik”.
Bestetik, Hezkuntza Saila hainbat ekimen gauzatzen ari dela adierazi dute, STEAM hezkuntza bultzatzeko; “garapen ekonomiko eta soziala bermatzeko elementu giltzarritzat” jotzen baitute hezkuntza-eredu hori.
