Guztira hogei lagun batu dira gaur goizean, lehenengo orduan, Izan bidea ekimeneko hiru milioi kilometro pasatxoei koska bat kentzeko helburuarekin. Babes neurriak hartuta, eta distantziak zainduta, lehenengo agerraldia egin dute Otalora eraikinaren parean, eta hor Mirari Irurek deialdia egin dio gizarteari, esanez, preso eta iheslarien auziari behin betiko konponbidea emateko ezinbestekoa izango dela jendartea aktibatu eta aniztasuna batzea. Eta, horrekin batera Garikoitz Garcia izan dute gogoan, espetxean dagoen azken preso aretxabaletarra.
Talde erretratua egitearekin batera martxan jarri dira, denek zutelako helburu berbera –Urkuluko urtegiari itzuli bat ematea– baina denek ez zutelako izerdia berdin bota behar. Lehenengo irten direnek oinez egin behar zuten itzulia, ondoren korrikalariek hartu dute erreleboa, patinatzaileak joan dira gero, eta azkenik, txirrindulariak abiatu dira.