"Birus honek gure bizitzetan lekua hartu duenetik, garbi ikusten ari gara gure adinekoen zaintza zein garrantzitsua den, berdin etxean zein egoitzatan", adierazi dute EH Bilduko kideek. Horregatik, oso eskertuta agertu dira horiek zaintzen dihardutenekin: "Jakin badakigu, etxez etxeko zerbitzuetatik hasi eta adinduen egoitzetaraino lan egiten duten behargin guztiek beraien onena eman dutela hilabete luze honetan, eta ematen jarraitzen duzuela".
Ildo horretatik, begi onez ikusi dute Aretxabaletako egoitzan langileei testak egiten hasi izana, baina etxez etxeko langileei ere egitea eskatu dute: "Haiek ere baldintza egokietan egin dezaten lan behar duten segurtasuna eskaini behar diegu. Etxean dauden adinekoek ere ondo zainduak izatea merezi dutelako".
Gaineratu dute, une honetan segurtasunez lan egin ahal izateko materiala jasotzen ari direla egoitzetako zein etxeetako langileak: "Hala ere, ez da nahikoa ganoraz lan egiteko eta ondo erantzuteko".
Senideren bat galdu dutenak ere gogoan izan dituzte: "Familiako kideren bat galdu duten horiei, gure saminik beroena luzatzen diegu".
