Herritarrak babestea oinarri, Udal Gobernuak hartutako zenbait erabakiri buelta emateko eskatu du EH Bilduk. Udalari zerbitzua ematen dioten kontratu batzuk mantentzea erabaki duen arren Udal Gobernuak, beste erabaki batzuekin ez dira konforme agertu EH Bilduko ordezkariak.
"Kontratu batzuk etetea erabaki du Udal Gobernuak. Kontratu horiek eteteak bi ondorio ekarriko lituzke: enpresek ERTEak egitea –eta langileak kaleratuak izatea– edo Udalak soldatak ordaintzea baina enpresak dirua galduz, eta ondorioz, –zenbait kasutan– ERTE bat egitera behartzea. Bi kasuetan, zerbitzua eten beharko litzateke, eta kasu batzuetan, langileak kaleratu beharko lirateke. Kontratu etetearen aukerak, pertsonek eta enpresek jasango lituzketen kalteak handiak izango liratekeela uste dugu".
Horrekin batera, Gobernuak ezarritako dekretuarekin beste aukera bat zabaldu dela adierazi gura izan dute: "Kontratu hauek indarrean mantentzea eta langileak beste momentu batean orduak errekuperatzeko aukera ematea eskatzen dugu. Ludoteka, gaztelekua, hizkuntza errefortzuak, Auzoko, kiroldegiko hainbat zerbitzu, garbitasuneko zerbitzu batzuk… indarrean mantentzea eskatzen diogu alkateari."
Aipamen berezia
Kultur arloko kontratuen egoerari dagokionez, bertan behera utzi diren kontratuek 23.000 euro suposatzen dute eta kontratu horien ekintzak bertan behera uztea baino gehiago, atzeratzea aukera onena dela uste dute.
