Urtarrilarekin batera hasi ziren 2001ean jaiotako neska-mutilak, 55 inguru, egubakoitz guztietan elkartzen dantzak ikasteko. Eta aste bukaera honetan entsegu orokorra egingo dute txistularien laguntzarekin.
Sasoi bateko ohiturari jarraipena emango diote. Martitzenean, Santa Ageda bezpera, baserririk baserri jardungo dute kopla kantuan eta eskean. "06:30inguruan elkartuko gara Herriko Plazan, eta bi taldetan banatuta joango gara auzoetara: batzuk, Oro eta Larrino aldera; eta besteak, Aozaratzara etaGoroetara. Eguerdian, guztiok elkartu eta Areantzatik eta Arkarazotik pasatuko gara, eta bazkaltzera herrira jaitsi. Arratsalderako utziko ditugu Izurieta eta Galartza inguruak", azaldu dute.
Eguaztenean, otsailaren 5ean ,ostera, kaleko bazterrak girotuko dituzte, 08:30 bueltan hasita: "Lantegietara eta bulegoetara joango gara, baita ikastetxeetara ere, eta etxeetatik ere pasatuko gara, noski". Iluntzean (19:00) lehenengo dantza saioa eskainiko dute Herriko Plazan. Orduantxe erakutsi beharko dute, herritarren aurrean, ikasitako guztia. Aratusteak bitartean, domeka guztietan elkartuko dira kintoak elkarrekin bazkaldu eta iluntzean dantzan egiteko plazan: "Talde polita osatu dugu eta jaiari ekiteko gogotsu gaude", diote.
Abesbatza eta musika eskola
2001ean jaiotako kintoak ez dira izango Santa Ageda bezperan kantuan egingo duten bakarrak.Ohitura duten legez, Aretxabaleta Abesbatzako kideek eta Leizarra musika eskolako hainbat ikaslek, herriko trikitilari taldearen laguntzarekin, Aretxabaletako Santa Ageda bertsoak kantatuko dituzte. Herriko Plazatik abiatu (18:15) eta zaharren egoitzatik pasatu ostean kalerik kale jardungo dute.
Basotxoko kantu taldea
Basotxo erretiratuen elkarteko kideek ere ez dute hutsik egingo martitzenean; horiek, Basotxotik abiatuta (18:00), ibilbidetxo bat osatuko dute herrian kantuan egin bitartean.
