Aretxabaletako eta Eskoriatzako nerabeen aisialdi beharren gainean egindako ikerketaren berri eman zieten, 12 eta 16 urte bitarteko seme-alabak dituzten gurasoei eta horiekin lanean diharduten hezitzaileei Farapi kooperatibako kideek. Udal ordezkariak, UDAko kideak eta gaztelekuko hezitzaileak elkartu ziren, besteak beste, gurasoekin batera. Eta aurkezpenaren bukaeran, hainbat hausnarketa partekatu zituzten horiek guztiek.
Denbora librea, garrantzitsua
Herriko bi ikastetxetako 112 ikaslerekin elkartuta, horiek zelan bizi duten nerabezaroa jaso dute diagnostikoan: "Mugarritzat adierazi dituzte DBHn sartu izana, espazio berriak konkistatu nahia, ardurak hartzea, kontzientzia piztea…", zioten Farapiko kideek. Eta bi aisialdi mota bereizten dituztela jaso dute: aste barrukoa, arautua –ingelesa, kirol jarduerak…– eta aste bukaerakoa, librea: "Modu intentsuan bizi dute hori, lagunak ardatz direla". Eskaeren artean, ostera, honakoak nabarmendu dituzte gazteek: "Norberaren autonomiaren garrantzia, denbora falta, espazio propioaren nahia, jaietan eurendako ekintzen beharra, pertsona erreferenteen garrantzia eta Udalarekiko urruntasuna, besteak beste".
Horiek guztiak entzunda gizarteak bultzatzen duen eredua, helduen hausnarketa beharra eta substantziak kontsumituko ez diren espazioen nahia aipatu zituzten elkartutakoek.
Bigarren fasean, parte-hartzea
Behin diagnostikoa aurkeztuta bigarren fase bati ekingo diote: parte-hartzeari. "Prozesuaren erdigunean egongo dira nerabeak eta elkarlanerako marko erosoa sortuko dugu. Fokua prozesuan jarriko da eta elkarrekin eraikitzeko aukera izango dugu, nerabeen ahalduntzea bilatuta", zioten Farapikoek. Partaidetza saio hori aurten egingo da, eta hiru fase izango ditu: lehenengoan, ikasle guztiek hartuko dute parte, gai garrantzitsuenak erabakitzeko; gero, lantaldeak sortuko dituzte, gai zehatzak lantzeko; eta kontraste fase bat egongo da bukaeran. Helburua aisialdiaren gaineko hausnarketa bultzatzea dela aipatu zuten.