Loramendi elkartearen ardurapean dauden hizkuntza errefortzuko eta ludotekako neska-mutikoek eta Auzoko egitasmoko kideek kolorez eta musikaz bete zuten Durana kalea eguaztenean. Halako ekimenak Auzokon dihardutenendako apartekoak direla adierazi du bertako dinamizatzaile Paloma Martinezek: "Integrazioan laguntzen du".
Kanpotik etorritakoei harrera linguistikoa egitea helburu duen Auzoko egitasmoan bi talde elkartzen dira, bata martitzenetan (10:00) eta bestea eguenetan (15:00). "Hamabost bat lagun gaude, baina bakarra naiz euskaraz dakiena. Horregatik, hemengoak animatu gurako nituzke, harrera hori berotzeko", dio Martinezek.
Taldekideak "gustura" elkartzen dira; Maragua sahararrak, esaterako, hiru urte daramatza: "Euskaraz ikasten dugu eta giro oso ona daukagu".
Hiru proiektu aurrera begira
Beste hainbat proiektu ere badituztela esku artean jakinarazi du Martinezek. Batetik, familia harrera edo familia laguna: "Bertako familia batek kanpotik datorren bati harrera egitea da".
Bestetik, Auzoko Txiki dago: "2 urtera arteko umeak dituzten etorkin familiei zuzendutakoa; hemengoekin elkartu eta umeen bueltan kantuan egitea, jolastea… litzateke asmoa".
Horrez gain, beste talde bat sortu gurako lukete: "Auzoko da euskara ezagutzen ez dutenendako, eta mintzapraktika dakitenendako. Bi horien arteko beste baten beharra ikusi dugu: berba egitera ausartu ez baina entzuteko gogoz daudenendako, poliki-poliki ikasten joateko…". Horiei guztiei heldu gura diete datorren ikasturtean.