"Neguko azokaren helburua herriko merkatari, artisau eta ekoizleei laguntzea da. Horrekin batera, herritarrei, Gabonetako erosketak herrian bertan egiteko gonbidapena egin nahi diegu", adierazi du Naia Agirrek, Enplegu eta Garapen teknikariak.
Zapatuan eta domekan, guztira, 23 postu jarriko dituzte herriko plazan, asteburuan egingo den neguko azokaren baitan, eta ordutegia honako hau izango da: zapatuan 10:30etik 14:30era eta 17:00etatik 20:30era izango da azoka zabalik eta domekan, goizez bakarrik. Hala ere, egubakoitzetik egongo da karpa jarrita, eta, eguaztenera bitartean, beste hainbat ekintza ere antolatu dituzte.
Motorrak berotzeko, buzkantzak
Neguko azokari hasiera emateko, egubakoitzean, buzkantz-dastatzea eskainiko dute UDA kirol elkartekoek. 18:30ean izango da, eta, haiekin batera, Aretxarte Merkatari Elkartekoek haurrentzako joko ezberdinak aterako dituzte plazara.
Ogia egiten ikasteko aukera
Astelehenean eta eguaztenean, abenduaren 19an, bestalde, ogia egiteko tailerra egongo da karpan arratsaldeko bostetatik aurrera. Aretxabaleta okindegiko Antonio Herruzo okina izango da tailerra ematen, eta herritar ororentzat izango da. Hori horrela, ez dago izena eman beharrik. Martitzenean, bestalde, urtero egiten den Gabonetako kontzertua eskainiko dute Leizarra musika eskolakoek. Emanaldia 18:00etan izango da, herriko plazan, eta ordubete inguru iraungo du.
GKEen presentzia
Herriko ekoizle, artisau eta merkatariez gain, Hiruatx gobernuz kanpoko erakundea eta Harreman denda ere izango dira azokan. Hotz Oñati taldekoek abian duten kanpainarekin bat egingo du Hiruatxek, eta salmentan jarriko ditu Grezian egindako tazak. Ateratako dirua Greziako proiektu ezberdinak finantzatzeko erabiliko da. Bestetik, Oñatiko Hermansoloña GKEri ere lagunduko dio Hiruatxek. Saharako kanpamentuen alde eta Oñatin dauden etorkinen alde produktuak batuko dituzte herriko plazako arkupeetan jarritako kaxetan.
Neguko azokako postuak
23 postu izango dira Aretxabaletako herriko plazan, askotariko produktuak saltzeko asmoz.
Merkatariak
• Belar Meta.
• Lie.
• Kiloka.
• Tinta Beltza.
• Titare.
Ekoizleak
• Mendibitzu.
• Etxe Zuri.
• Jakion.
• Jose Lombide
Artisauak
• Okila
• Gu Haziak Gara
• Kontxi Gonzalez
• Iban Urreta
• Nerea Maskariano
• Mari Luz Osorio
• Lara Garcia
• Izaro Sanchez
• Yael Eva
Idazleak
• Josune Murgoitio
Musikaria
• Ibai Mujika
Beste Batzuk
• UDA
• Orly taberna
Hiruatx eta Harreman gobernuz kanpoko erakundeak ere izango dira bertan.
