Orain dela sei urte ekin zion ibilbideari Kuku Miku elkarteak, eta osasuntsu jarraitzen du lanean. Egun, 47 bat familia dira bazkide, eta 0 eta 6 urte arteko 60 bat neska-mutiko elkartzen dira han, Durana kalearen atzeko partean duten egoitzan –Gurea taberna alboan–.
Trebakuntza saioak
Haurren garapenerako elkartea da, eta haurrentzat eta gurasoentzat erreferentziazko topaleku izateko helburuarekin sortu zen. "Haurrei jolasaren eta elkarrekintzaren bidez garatzeko espazio bat eskaintzeaz gain, gurasoen gogoetarako eta formaziorako gune ere izan nahi du Kuku Mikuk", adierazi du Oihana Garcia Insaustik, ekintza antolatzaile taldean dagoen kideak. Horretarako, ikasturte osoan zehar garatzen diren jarduera iraunkorrak dituzte, hala nola komunikazio ez bortitzean aditua den Nerea Mendizabalek gidatzen duen guraso-eskola. Horrez gain, hilean behin gurasoentzako hitzaldiak, tailerrak edo ikastaroak antolatzen dituzte: "Haurren larrialdietarako lehen sorospenak, elikaduraren eta loaren gainekoak, motxila eramangarriari buruzkoak, matematikaren gainekoa… Gaiak oso zabalak dira, eta edonorendako", dio Garcia Insaustik. Izan ere, trebakuntza-saio horietara interesa duen edonor gertura daiteke, bazkide izan edo ez.
Umeendako ekintzak ere izaten dituzte, ipuin kontaketak eta txotxongilo tailerrak, besteak beste. Bazkideak, gainera, edozein unetan gertura daitezke egoitzara, umearekin lasai egoteko, jolasean jarduteko edo ipuinak kontatzeko. "Negu partean eskaera handiagoa dago, baina betekadarik ez da egon izan. Uda sasoian, ostera, geratu egiten ditugu aktibitateak". Sei urte bitarteko umeendako izan arren gehiengoa hiru urtetik beherakoa dela gaineratu du Garcia Insaustik.
Doluaren gaineko hitzaldia
Doluaren gaineko saioa egingo dute abenduaren 17an, astelehena, 17:30ean, pare bat orduz. Eider Otxoa aretxabaletarrak gidatuko du, eta heriotzaren gainean egingo die berba: "Umeek heriotza zelan bizi duten adieraziko digu, aholkuak eman gurasooi eta material lagungarria eskura jarri; liburuak, esaterako".
Urtarrilean, ostera, azaroan egitekoak ziren lehen sorospenen gaineko ikastaroari helduko diote – data oraindik zehaztu barik–. Horretarako, Debagoieneko ospitaleko mediku bat eta erizain bat etorriko dira.
