Aretxabaletan ez da izen-ematerik itxi, eta dagoeneko 1.184 ahobizi eta 270 belarriprest dabiltza txapa paparrean jarrita. Egunotan bizi izan dituzten esperientziak partekatzeko tartetxo bat hartu zuten atzo iluntzean horietako batzuek, eta gustura jardun zuten kontukontari udaletxe zaharrean.
Ez da izan astean egin den ekitaldi bakarra; izan ere, solasaldi bana eskaini dute Miriam Urkia euskaltzain osoak eta Kike Amonarriz soziolinguistak. Herritarrek harrera beroa egin zieten, eta benetan gustura jarraitu zituzten haien esanak. Horrez gain, Basotxoko kantu taldeak euskal abestiekin girotu zituen kale bazterrak eguaztenean.
Gaur Manex eta Kobreak
Gaur, ostera, Manez eta Kobreak taldearen ekitaldia izango da; 22:00etan, Arkupen (sarrera: 4 euro). Kalakan taldeko Thierry Biscary kide ohia da gidaria, eta alboan izango ditu Kobreakeko musikariak: Ana Telletxea (ahotsa, akordeoia eta perkusioak), Fermin Garaikoetxea (ahotsa, tronpeta eta bonbardinoa), Vianeey Desplantes (ahotsa eta bonbardinoa), Bixente Etchegaray (ahotsa eta tronpeta), Laura Etchegoyhen (ahotsa eta saxofoia) eta Mixel Ducau (ahotsa eta saxofoia).
Jaialdia, 18:30ean hasita
Jai giroan hasi zenari jai giroan eman gura diote bukaera. Hala, astelehenean, Euskararen Nazioarteko Egunean, borobilduko dituzte egunotan hartutako konpromisoak, esfortzuak eta ohitura aldaketak.
Hasierako ekitaldian lez, Herriko Plazan elkartzeko dei egin dute (18:30). Leizarra musika eskolako nagusien dantza taldearen emanaldiak irekiko du ospakizuna, eta, ondoren, Euskaraldiari babesa emandako taldeetako ordezkariei dei egingo diete, elkartu eta argazkia ateratzeko. Bukaerako mezuaren berri emango dute, gero, Loramendi elkarteko kideek, eta, ospakizuna jai giroan bukatzeko, flashmob-a dantzatuko dute elkartutako guztiek, helduek eta umeek.