Herri kirol askoren erakustaldiak domekan

Domekan, eta San Migel jaien baitan, herriko plazan egingo diren herri kiroletan, lau aizkolari eta aita-alaba harri jasotzaileak arituko dira, besteak beste. Hitzordua 13:00ean hasiko da: lehenik, erakustaldia eta ondoren, lehiaketa izango da.

Domekan San Migel jaien barruan egingo diren herri kirol probek denetarik izango dute. Hain zuzen ere, herriko plazan egingo dira, 13:00etan. Lehenik, erakustaldia egingo da eta horren ondoren, lehiaketaren txanda izango da.

Hasteko erakustaldia

Alex Txikon, Julen Aranberri, Telletxea eta Bihurri aizkolariak arituko dira, lehenik. Iparraldeko jokoak egiten Karlos Aretxabaleta arituko da –lasto fardo altxaketa, ingude jasotzea eta lasto jaurtiketa– eta harri jasotzen Joseba eta Udane Ostolaza aita-alabak arituko dira.

Aita eta alaba, harria jasotzen

Joseba Ostolaza eta Udane Ostolaza aita-alabak dira eta harria jasotzen arituko dira domekan, Aretxabaletako herriko plazan. Aitak Orion harri eskola bat sortu zuen duela urte batzuk, eta, hamar mutiko inguru egoteaz gain, bere alabari harriak nola jaso erakusten dio. Harria jasotzea zer den ezagutu nahi dutenei zuzenduta dago eskola, batez ere. Udanek 13 urte ditu eta 20 kilo dituen harri bat jasotzeko gai da, eta, hori gutxi balitz, eskubaloian ere jokatzen du. Hala ere, aitarekin erakustaldietara joatea eta harria jasotzea gustatzen zaio.

Ondoren, lehiaketa

Erakustaldiaren ostean, lehiaketarekin hasiko dira eta bi hirukoteren artean pentatloia jokatuko da; hau da, aizkoran, harria jasotzen, trontzan eta txinga korrika eramaten aritzea. Hori amaituta, motozerra-proba izango dute eta, saioari amaiera emateko, harri jasotzaileek agurra egingo dute.

Herri kiroletako promesak

Ernesto Ezpeleta Bihurri aritu da domekako hitzordua antolatzen, eta, adierazi duenez, Aretxabaletan egingo den erakustaldian proba asko ikusteko aukera egongo da. Horrez gainera, aitortu du herri kiroletan esperientzia dutenak eta gazte promesak gonbidatu nahi izan dituztela, azken horiek ezagutzen joateko helburuarekin.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.