Eguaztenean egindako osoko bilkuran, Euskaraldiarekin bat egin zuen Udalak. Hori baino gehiago, ekimenaren sustatzaile izatea onartu zuten udalbatzako kideek, baita "erantzukizunez eta eredugarri izanez jokatzea" ere. "Euskaraldiari atxikimendua eman diogu adierazpen honekin, bai Udal barruan bultzatzeko, bai kanpoan. Euskararen erabilera sustatzeko azaro eta abendu bitartean hamaika egunez egingo den ariketa izango da", zioen Aitor Gabilondo Euskara zinegotziak.
Batzordea martxan
Ordezkari politikoak konpromisoak hartzeko gertu azaldu ziren, "bereziki, Udal barrura begira", eta ahalik eta ahobizi eta belarriprest gehien aktibatzeko urratsak egingo dituztela onartu: "Ahobizi-ok euskara ulertzen duten guztiekin euskaraz aritzeko konpromisoa hartzen dugu. Belarriprest-ok gainerakook gonbidatuko ditugu gurekin euskaraz egin dezaten". Era berean, herritarrak ere ekimenean parte hartzera gonbidatuko dituztela adierazi zuten, "izena emateko bideak erraztuz".
Gabilondo zinegotziak gogorarazi zuen Aretxabaletan osatuta dagoela lantalde bat: "Martxan dago batzordea eta buru-belarri dabil lanean". Batzorde hori indarberrituta itzuliko da irailean, eta, orduan, hainbat ekimen jarriko ditu abian.
"Udalak, asko egiteko"
Adierazpen instituzionala aho batez onartu bazuten ere EAJk, EH Bilduk eta Irabazik, Ion Albizu EH Bilduko zinegotziak azpimarratu gura izan zuen Udalak zeresan handia duela kontu honetan: "Asko du egiteko. Izan ere, Udalaren esku dago, esaterako, euskaltegia, eta haren bitartez euskararen jakintza bultzatzea.
Matrikularen doakotasunaren bidea zabaldu gura izan dugu guk, eta ildo horretatik proposatu genuen matrikula erdira jaistea datorren ikasturtean; baina ez ziguten onartu".
Bestetik, euskaraz ez dakitenei begira, zera dio Albizuk: "Belarriprest direnen konfiantza berreskuratu beharra dugu; maitemintzen lagundu behar diegu eta erakarri egin behar ditugu euskarara".
