"Kanpoko eskaera bati esker hasi nuen ikerketa, baina aurretik ere banekien alkate jatorra eta ezaguna izan zela", halaxe abiatu zuen lana Antxiak. Jauregiren bizitzako pasarteak eta istorioak jaso ditu, baita datu genealogikoak eta gorabehera politikoak ere, politikak zeresan handia izan zuelako haren bizitzan, batez ere, II. Errepublikatik Espainia ko gerra bukatu arte.
Bederatzi boto jasota alkate
Bigarren Errepublikan, 1931n, izendatu zuten alkate. Hauteskundeak deitu zituzten orduan, eta PNV-EAJk bost zinegotzi lortu zituen eta Katoliko Monarkikoek beste bost. "Alkatea izendatzeko bozketa egin zenean bederatzi boto jaso zituen Jauregik; hau da, bere alderdikoez gain, beste lau ere bai. Horrek zerbait esan gura du", dio Antxiak.
Hurrengo urtean, baina, hainbat udalbatza deuseztatu zituen gobernadoreak Gipuzkoan, alkateak kendu eta batzorde eragileak izendatu. 1934an, udalbatza berria izendatu zuen gobernadore horrek, baita alkatea ere: Jose Mari Amuriza. Baina 1935ean berreskuratu egin zituzten euren karguak Jauregik
eta haren kideek. Urte haien bueltan EAJren Udal Buru Batzarrak lokala ireki zuen Durana kalean; Emakume Abertzale Batzak Aretxabaletako ikastola antolatua zeukan; Goroeta auzorako bide berria egitea erabaki zen, langabeak kontratatuta; sekularizazioa sustatu zen Cementerio Civil izeneko kartela jarrita; eta ikurrinaren aldeko mozioa aurkeztu zuten.
Hamabi urte kartzelan
Kargutik kendu egin zuten 1936an, Gerra Zibila hastean, eta hurrengo urtean atxilotu Santoñan. 30 urteko kartzela zigorra ezarri zioten eta hamabi urte egin ondoren askatu zuten. Errenteriara joan zen bizi izatera orduan, hil arte. 1978an, Kurtzebarri mendiko gurutzearen 50. urteurreneko ospakizunean, omenalditxoa jaso zuen Aretxabaletan; izan ere, gurutzea jarri zuenetako bat izan zen hura.
Liburua salgai egongo da bihartik, Arkupen, 3 euroren truke.