Herritarrek ere badute zeresana Andramaixetan

Mirari Altube Arrese 2017ko uzt. 29a, 11:27

UDAko sei bat lagun elkartuko dira abuztuaren 14an jaiei hasiera emateko eta hilaren 16an Xabi Antxia eta Laiba Mudassar alkate eta alkate-orde txikiek izango dute txupina botatzeko ardura. Txosnagunean, ostera, herriko musika taldeak elkartuko dira.

Egunotan jasoko dute aretxabaletarrek etxean Andramaixetako egitaraua. Kultura Sailari eta Gazte Ekimeneko kideei esker ekitaldiz gainezka datoz aurten ere herriko jai nagusiak, eta herritarrek zeresan handia izango dute beste behin.

Aretxabaleta kirol elkartearen ordezkaritza batek botako du txupina eta irakurri pregoia jaiak hasteko. Emakumeei eman gura diete protagonismoa UDAkoek: "Seguru asko gimnasia erritmikoko kirolari bat izango da mikrofonoa hartuko duena", jakinarazi du Agurtzane Elkoro presidenteak. Eta herrian egiten duten "lanaren errekonozimendua" delako oso pozik agertu da.

Jaietarako gogotsu daude era berean, Haurren Egunean txupina botako duten Xabi Antxia alkate txikia eta Laiba Mudassar alkate orde txikia. Biek ala biek lan handia izango dute, gainera, egun horretan, herritarren ordezkari izango direlako.

Txosnagunean herriko taldeak 

Herritik sortua herriarrendako antolatua leloarekin txosnagunea herritarren topalekuetako bat izango da, eta herriko musikariek oholtza gertu izango dute. D-Skarga, Txerrikumeak, HKB, Gatributu, Criminal Remains eta Krisis taldeek jardungo dute besteak beste, eta rock, punk eta pop doinuekin girotuko dituzte hilaren 13a batzuk eta 16a besteek. Wood Strings taldeak, ostera, beste doinu batzuk ekarriko ditu: "Gitarra bi, bateria eta txeloarekin osatutako taldea gara. Country ukituak dituzten talde amerikarren bertsio batzuk egiten ditugu baina ez dakigu zelan etiketatu gure musika; etorri egin behar ikustera!", dio Eñaut Zubizarreta taldekideak. Eta musika elektronikoak ere izango du tokia, herriko eta kanpoko hainbat disko jartzaileri esker.

Horrez gain, beste hainbat herrikidek ere egingo dute lan jaiotan, kale bazterrak girotuko dituzte txistulariek eta 79. txirrindularitza lasterketaren antolatzaileek eta boluntarioek, esaterako.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak