Zenbat ume eta gaztetxo daude gaur egun harrera familien zain?
Gaur egun 313 ume eta nerabe bizi dira Foru Aldundiaren egoitzetan. Horietatik 60 ume eta nerabe daude familia baten zain.
Zenbat familia beharko lirateke?
Beharra etengabea da. Orain 60 familia behar ditugu, baina kopuru hau aldatzen doa. Kontuan hartu urtean zehar Aldundiak ume askoren ardura hartu behar duela, ume horien gurasoek ezin dituztelako ondo zaindu. Gainera, era askotako familiak behar dira: larrialdi harrera egiteko prest daudenak, baina baita ere behin-behineko harrera edo luzaroko harrera egiteko prest daudenak. Eta umeen adina ere desberdina izaten da: baditugu ume txikiak, baina baita nerabeak ere. Eta horientzat oso garrantzitsua da aukera izatea familia batean bizitzeko.
Anai-arrebak ere badaude harrera etxea behar dutenen artean?
Bai, kasu batzuetan anai-arrebak izaten dira, eta ahal izanez gero, onena litzateke elkarrekin egotea familia batean. Baina hori ezin bada, behintzat, familia desberdinetan egon daitezke, eta beraien arteko harremana mantendu dezakegu bisiten bitartez.
Ze baldintza behar dira harrera familia izateko?
Era askotako haurrak eta nerabeak daude eta, horregatik, familiak ere era askotakoak behar dira; ez dago profil bat zehaztuta. Baina hainbat baldintza bete behar dituzte. Adibidez: familia osoak ados egon behar du erabakiarekin; garbi izan behar dute beraien nahia harrera egitea dela, ez adoptatzea; prest egon behar dute haurra edo nerabea beraiekin hartzeko, kontuan hartuta ume horren historia, ohiturak, familia eta izaera; familia horrek malgutasuna izan behar du aldaketetara moldatzeko; eta prest egon behar dute profesionalen informazioa eta aholkularitza jasotzeko. Harrera familiek jakin behar dute arazoak izango dituztela; baina ez dira izaten arazo gaindiezinak. Horren proba da dagoeneko 350 harrera familia ditugula, baina gehiago behar ditugu. Alde horretatik konfiantza osoa dugu Gipuzkoako gizartearekin. Era berean, esan harrera familiekin hitz egiten dugunean, esaten digutela oso esperientzia aberasgarria dela. Umeari maitasuna eta segurtasuna ematen diotela, baina trukean %200 jasotzen dutela.
Harrera familia izateak ez du zerikusirik adopzioarekin, ezta?
Garbi esan behar da harrera ez dela adopzio bat, ezta bidea ere adopzioa lortzeko. Aldi baterako neurria da, zeren azken helburua da adingabea bere etxera itzultzea, jatorrizko familiak bere arazoak konpondu arte. Hala ere, harrera familia luzatu egin daiteke haurrak adinez nagusiak izan arte.
Zer egin behar dute harreragile izan nahi dutenek?
Argibide gehiago izateko, hauek dira kontaktuak: 943 11 25 22 eta familiaharrera@gipuzkoa.eus.