Oihalak joan den zapatuan josi zituzten eta bihar, egubakoitza, aurkeztuko dute herritarrek egindako abestia. "Erabakitzeko eskubidearen alde gauden aretxabaletarrok abestia grabatu dugu herriko musika-artista batzuen laguntzarekin eta Arteman komunikazioak egin du", jakinarazi dute herriko lantaldeko kideek.
Sarrerak guztiendako
Anoetako ekitaldirako sarrerak Arkupeko harreran dauzkate salgai. Hona prezioak: 0 eta 2 urte bitartekoek debalde; 3 eta 14 urte bitartekoek, bost euro; eta 15 urtetik gorakoek, hamar euro. Nahiz eta debalde izan umeen sarrera, derrigorrez hartu behar da. "Zenbakituak izango dira, beraz, komeni da taldean joanez gero, sarrerak ere taldean erostea, bata bestearen ondoan jarri ahal izateko", jakinarazi dute.
Autobusak ere antolatu gura dituzte Aretxabaletatik eta plazak mugatuak izango direnez lehenbailehen emateko izena eskatu dute; prezioa da, hiru euro.