Lore Martinez Axpek, Ingurumen zinegotziak, zera jakinarazi du: "Proiektu pilotu honen inguruko balorazioa egiteko beharra ikusten dugu, eta, bide batez, zalantzak, esperientziak eta bestelakoak konpartitzekoa erabiltzaileen artean".
Tailer praktikoa gunean
Batzar hori teorikoa eta praktikoa izango dela iragarri du Martinez Axpek: "Lehenengo aurkezpen txiki bat izango da konposta egiterakoan izaten diren ohiko arazoak ezagutzeko eta identifikatzeko". Eta ondoren tailer praktikoa egingo dute auzo-konposta gunean, Txarapean. Ondorengo kontuak landuko dituzte bertan: arazoak ezagutu eta konpondu; maneiua; konposta atera eta erabili; konposta motak; hobarien gaineko argibideak; eta zalantzak eta galderak.
Auzo-konpostaren funtzionamendua egoki izan dadin "ezinbestekoa" dela elkartzea jakinarazi du zinegotziak.
