Lekaixoka bertso eskolako hiru kide Martxoan Bertsoa lehiaketan izango dira

Beñat Zamalloa, Martin Berrizbeitia eta Aitor Lizarazu bertso ikasleak.
Hirukotea elkartu, mozorroa jantzi, Urretxuko Motz tabernara jo eta bertsotan egin. Parrandarako hitzordua ote da? Ez, Zumarraga-Urretxun jokatuko duten Martxoan Bertsoa lehiaketarako hitzordua da. Gaur, otsailak 28, jokatuko dute lehen kanporaketa, eta bertan izango dira Lekaixoka bertso eskolako hiru kide: Beñat Zamalloa, Martin Berrizbeitia eta Aitor Lizarazu.

"Bertsozaleak, bertso eskoletako ikasleak, sasi-bertsolariak… elkartuko gara, parte hartzea eta ondo pasatzea helburu bakarrak dituen lehiaketan", argitu du jatorriz Zumarragakoa izan eta Aretxabaletan bizi den Lizarazuk. Eta mozorroa? "Aratusteak gainean ditugu eta animatzeko da; baina ez dugu argituko zelan jantziko garen", gaineratu du.

Bigarrenez joango dira Lekaixokako kideak Martxoan Bertsoa lehiaketara, eta horixe, "ondo pasatzea" beste asmo barik. Parte hartuko duen hirukotea animatzera, gainera, hainbat aretxabaletar hurreratuko dela jakinarazi digute, "bertsoak aitzakia hartuta ondo pasatzeko asmoarekin doaz".

Gaur hasi eta martxoaren 21a bitartean lau kanporaketa izango dira –bakoitzean hiru hirukote– , egubakoitzetan, Zumarraga-Urretxu aldean. Epaile bik jardungo du bertsolarien lana epaitzen, eta puntu gehien lortzen duten hiru bikoteek finala jokatuko dute martxoaren 28an, Zumarragako gaztetxean.

Emakumeen Egunera begira saioa

Bestalde, Lekaixoka bertso eskolako helduen eta gazteen taldeetako kideak, Miren Amuriza irakaslearen gidaritzapean, bertso saioa gertatzen dabiltza Emakumeen Nazioarteko Egunera begira. Hurrengo egubakoitzean, martxoak 7, egingo dute saio hori udaletxe zaharrean. Amurizak berak egingo ditu gai-jartzaile lanak eta eskolako kideek bertsotan jardungo dute.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.