Arkupe kultur-etxean bildu dira 30 ikasle inguru. Eurekin batera, irakasleak eta Ibarraundi museoko Saioa Alzue izan dira. Ikasleen partetik proposamen asko jaso dituzte, denak biodibertsitatearekin lotuta. Guztira, 15 izan dira aurkeztutako proposamenak eta galderak. Hauek dira ikasleek aurkeztutako proposamen batzuk, eta Ingurumen eta Hirigintza zinegotziek eman dituzte erantzunak:
Gaur egun jartzen diren alanbrezko laukidun itxiturak ez dira egokiak, animalien mugikortasuna oztopatzen dutelako. Baserritarrei informazio hau zabaldu neurriak har ditzaten.
Lurzoru pribatuetako itxituren helburua euren nekazaritza-ustiategiak, animaliak... babestea da. Zentzu horretan, Udaletik gauza gutxi dugu egiteko, ez bada zuek proposatu moduan informazioa ematea. Hala ere, kasu gehienetan alanbrezko laukidun itxiturak errepideen inguruan erabiltzen dira eta ez baso edo beste lurzoruen kontra dauden itxituretan.
Komentu atzetik elizaraino dagoen tartearen behaketa egin eta zerbait egin daitekeen aztertzea.
Lortzen ari den lehenengo helburua uraren kutsadura bukatzea da. Bigarren fasean, hormigoizko zolata kendu eta alboetan elementu naturalez (harriak…) osaturiko hormak egitea izango litzateke helburua, bertan animaliak eta landareak bizi ahal izateko.