Urte hauetan guztietan gora egin du herriko lorategien kopuruak, Manolo Hernandez lorazainaren esanetan. "Herria bera ere handitu da eta berarekin batera lorategien kopurua. Lanik ez zaigu falta!".
Urtean birritan egiten dituzte landaketak Makaiko hiru lorazainek: udaberrian eta neguan, hain zuzen ere. Hori horrela, denboraldiko landare eta loreak ipintzen dituzte, zaintzeko askoz errazagoak dira eta modu horretan jardutea, gainera, merkeagoa da. "Gutxi gorabehera, beti eduki izan dugu irizpide hori lanean".
Neguan pentsamenduak landatu zituzten. Orain, aldiz, batez ere begoniak ipini dituzte Aretxabaletako lorategietan eta Durana kaleko faroletatik esekita eta udaletxe kanpoko loreontzietan, aldiz, surfiniak. "Zergatik? Gehiago irauten dutelako, horrexegatik".
Gertakari puntual batzuetan izan ezik, lorategien itxura ederra zaintzen dute herritarrek, Hernandezen esanetan. "Edertasuna begitik sartzen den zerbait izanda, gehienek gustuko dute txukun mantentzea". Baina ez du ukatzen zenbaitetan lana izaten dutela hondatutakoa konpontzen.
Txakurren kakak, kaltegarri
Bestalde, urtetako borroka bati amaiera eman guran dabiltza: txakurren kaken arazoari, hain zuzen. Izan ere, lorategien itxura zatartzeaz gainera, kaltegarria da landareentzat. "Jendeak ez du bere txakurrak lorategian egindakoa jasotzen; ongarria dela uste du, baina ez da horrela, daukan azidoak min egiten die loreei eta baita belarrari ere, dena erretzen du eta. Baina ez kakek bakarrik, txizak eragin bera du".
Ana Bolinaga alkatearekin ere egin dute berba herriko lorazainek arazoari irtenbidea topatu guran: "Zakarrontzi bereziak ipiniko dituztela esan digu".