Osoko bilkura hasteko minutu gutxi falta zirela urduritasuna zen nagusi Aretxabaletako udaletxeko aretoan. Udal ordezkariekin ez dute egunero berba egiten, eta, hortaz, aurkezpena ondo irteteko, esan beharrekoa behin eta berriro errepasatzen ari ziren Kurtzebarriko ikasleak.
Ana Bolinaga alkatearen agurraren ondotik, ikasturtean biodibertsitatea jorratu dutela azaldu zuten neska-mutikoek. Batzuek landare eta zuhaitzekin lotutako askotariko ekintzak egin dituzte; beste batzuek herrian azpiegiturak eraikitzeak animaliengan duen eragina aztertu dute. Horrez gain, Deba erreka eta basoen egoera eta historian zehar lurzoruak izandako galerak ere aztertu dituzte ikasleek.
Esan bezala, proposamen zehatzak ere egin zizkieten politikariei, hala nola, landare inbaditzaileak zuztarretatik ateratzea; edozein motatako lanak egiterakoan animaliengan pentsatzea eta animaliendako babeslekuak jartzea; kiroldegi inguruko saski-arkazikak kentzea eta bertako zuhaitzak landatzea; erreka garbitzea edo Larrin plazan eraikitzen hasita baina amaitu gabe dagoen etxe horretarako konponbidea bilatzea.
Erantzuna
Udal zinegotziek adi entzun zituzten neska-mutikoen azalpenak, eta aurkezpena amaitzean, Ingurumen zinegotzi Lore Martinezek hartu zuen hitzak. Batzordean proposamen guztiak aztertuko dituztela eta irailean adostutakoaren berri emango dietela esan bazuen ere, dagoeneko hainbat ekintza egiteko asmoa daukatela jakinarazi zien. Besteak beste, irailean Deba erreka garbituko dela eta landare inbaditzaileak dagoeneko sailkatuta dituztela eta kentzeko asmoa dutela azaldu zien.