Aretxabaletako 52 familiak eman zuten izena auzo-konposta egiteko, eta Udalak Txarapean kokatu zuen gunea. Oraindik martxan ez egon arren, datozen asteotan den-dena prest izatea espero dutela adierazi du Anabel Diezek, Ingurumen teknikariak: "Gunea egokitzeko lanak bukatuta daude, konpostagailuak bakarrik falta dira".
Proiektu pilotua, gune bakarra
Hain zuzen ere, Debagoieneko beste hainbat herritan bezalaxe, Aretxabaletan ere konposta egiteko dei egin zien Udalak herritarrei. Alde batetik, auto-konposta egitera animatu gura izan zituzten konpostagailua non ipini zeukatenak; baina gainera, Txarapea, Iturrizar eta Lausitta kaleetako bizilagunei ere dei egin zieten auzo-konposta egiteko izena eman zezaten.
"Behin gunea prestatuta, zortzi multzo ipiniko dira, bakoitzak lau edukiontzi izango ditu, 32 ontzi guztira". Ingurumen teknikariak gaineratu duenez, nahiz eta 52 familiak eman duten izena, 60k edukiko dute aukera auzo-konposta egiteko. "Gunea aurkezteko edukiontziak ipintzen direnean, izena eman dutenekin bilera egingo da, antolamendua zehazteko".
Gune gehiago aurreikusten duten galdetuta, "proiektu pilotua denez, bakarra izango da, oraingoz". Gerora, emaitzen arabera, "gehiago ipiniko dira, behar izanez gero".