Dagoeneko 22 lagunek eman dutela izena auzo-konposta egiteko jakinarazi dute astean Lore Martinez Axpe Ingurumen zinegotziak eta Josu Zaloña Txarapea ibilbideko bizilagunak. Horretarako deia egin diete Iturrizar plaza, Lausitta kalea eta Txarapea ibilbide inguruan bizi diren herritarrei, konposta gunea Txarapean egongo delako. "Beste auzo batzuetako bederatzi lagunek ere eman dute izena; eta beste inon jar daitekeen aztertuko dugu aurrerago", azaldu zuten. Izan ere, lehenengo hori "esperientzia pilotua" izango dela jakinarazi zuten, eta horren arrakasta ikusita aztertuko dute herriko beste gune batzuetara zabaltzea.
30 metro koadroko gunea
Auzo-konposta egiteko gune horrek 30 metro koadro inguru izango ditu eta barruan lau konpostagailu, tamaina ezberdinetakoak. Horietara etxeetako hondakin organikoak eroango dituzte izena emandako bizilagunek. Eta zuhaitz adarrak eta moztutako landareak jasotzeko lekua ere egongo da.
Txarapeako gune hori hurrengo asteetan egokituko dute eta otsaila bukatu aurretik erabilgarri egotea gurako lukete Ingurumen Saileko kideek. "Izena emateko epea oraindik ez da bukatu eta askoz gehiagok ematen badute behar bada gune handiagoa egokitu beharko dugu", zioen Martinez Axpek pozik: "Jasangarritasunaren eta konpromisoaren aldeko pausuak ematen gabiltzanaren seinale".
Hor lortuko den konposta lorategietarako erabiliko dutela iragarri zuten, eta herritarrek ere eskatu ahal izango dute.
Konposta egiteko ikastaroa
Auzo-konposta egingo duten horiez gain, beste 16 lagunek auto-konposta egiteko interesa agertu dute. Udalak horretarako behar duten konpostagailua emango diete datozen egunotan. Eta horiek guztiek konpostatzearen gaineko ikastaroa jasoko dute otsailaren 5ean, martitzena (19:00).