Lehen Hezkuntzako ikasleek, 6 eta 12 urte artekoek, zarata aztertu dute batetik, eta gunerik zaratatsuenak identifikatu: errepidea eta obrak. Gainera, herritarren %60k arazotzat du, lo egiten uzten ez dietelako eta horren gaineko araudia eskatu dute. Bestetik, argi kutsadura ikertzen jardun dute, eta ondorioztatu farola egokiak jartzeko ahalegin handia egin duela Udalak.
DBHko ikasleek, 12 eta 16 urte artekoek, zarata eta argiarekin batera uhin elektromagnetikoen eragina aztertu dute. Egunero erabiltzen dituzten tresna askok uhinak zabaltzen dituztela konturatu dira eta horien eragina murriztea guztion esku dagoela ondorioztatu.
Hala bada, hainbat konpromiso hartu dituzte ikasleek kutsadura horiek guztiak murrizteko: zaratari dagokionez: garraio publikoa erabili; oihu gutxiago egin eskolan, etxean…; argiari dagokionez, behar denean isiotzea bakarrik; eta uhinei dagokienez, poltsikoko telefonoa eta wifia gutxiago erabiltzea…
Udalari ekarpenak
Herriko egoera hobetzeko, ostera, hainbat ekarpen egin dizkiote Udalari. Zaratari dagokionez: autobidean panelak jartzea; eskola aurreko zirkulazioa desbideratzea; jaietan musika baxuago jarraraztea… Argi kutsadurari dagokionez: farolak eguzki energiaz horni daitezkeen aztertzea. Eta uhinei dagokienez: informazioa zabaltzea; prebentzioa bultzatzea; wifia ordez kablea bultzatzea…
Ekitaldia bukatu aurretik aparteko eskaera egin diote Kurtzebarriko kideek Udalari: jolasleku duten Iturrigorri pilotalekuan usoekin dagoen arazoa konpontzea.