Udala antolatzaile nagusi dela eta herriko eragileen parte-hartze zuzenarekin, primeran joan da Aramaioko Jubilatuen Eguna. Une gorena, ohi bezala, mezaren osteko Papargorri abesbatzaren eta Lagun Artean dantza taldearen emanaldiek eragin dute. "Urtero hartzen dugu parte, eta gozamena da. Herri ekimen bat eta herriaren parte gara; herri txikia gara eta ohitura gaude ekimenetan parte hartzera. Jubilatuen Egunean ia herriko elkarte guztiak irteten gara kalera", adierazi du Papargorriko zuzendari Larraitz Arriolabengoak.
Lagun Artean dantza taldeko Leire Arrizabalaga ere oso harro dago Jubilatuen Egunean sortu ohi den giroaz, eta bereziki pozik dago dantza taldea "osasuntsu" dagoelako: "Urteak pasatu ahala gero eta indar handiago hasi da hartzen dantza taldea eta plaza horrela ikustea oso pozgarria da".