Bizikleta eta oinezko ugari igarotzen den bidea da Jarindogoitikoa, eta Agirrek azaldu duenez "guztiz hondatuta" zegoen bidea: Baimendu gabeko autoak askotan igaro dira bertatik; bidea hondatzen denean, ezin dira ez oinezkoak ezta bizikletak igaro". Ondorioz, Aramaioko Udalak ia 20.000 euroko inbertsioa egin du, Zuberotik Kurtzetako errepidera doan bide bat konpontzeko, eta Jarindogoiti bidea konpondu eta harriekin ixteko.
Aramaioko Alkateak jakinarazi du autoak Jarindogoititik igarotzea "debekatuta" dagoela, eta norbaitek bertatik igaro beharko balu, baimena eskatu beharko duela. "Arabako Foru Aldundiko arauak dioen bezala, autoren bat bertatik igarotzen harrapatu ezkero, isuna izango du", amaitu du Agirrek.
Autoek hondatutako bidea, konpondu aurretik. Irudia: Aramaioko Udala.