Indarkeria Matxistaren Kontrako Egunetik haragoko egitaraua antolatu dute Aramaion, eta bihar, 19:30ean hasita, Tortura emakumeon gorputzetan izeneko saioa egingo dute, Aramaioko Talde Feministak eta herriko hainbat emakumek osatutako Emuixon musika taldeak elkarlanean antolatuta. Hitza, musika eta kantua oinarri hartuta, indarkeria matxista politikoa eta sexu-tortura salatuko dituzte: "Memoria egin eta aitortza eta erreparazio kolektiboaren bide horretan gure aletxoa jarri nahi dugu ekimen horren bidez".
Saioa prestatzeko, Intxorta 1937 Kultur Elkartearen ekimenez sortutako eta zortzi emakumeren testigantzetan oinarritutako Tortura Arrasaten, genero ikuspegitik liburua eta Olatz Dañobeitiaren Sorginak, putak, terroristak liburuak erabili dituzte. Antolatzaileek aurreratu dutenez, talde feministako sei kidek liburu horietako pasarteak eta haien bizipenak kontatuko dituzte. Horri lotuta, gaiari lotutako pare bat kantu abestuko ditu Emuixon taldeak.
Hainbat helburu lortzeko nahia
Hainbat helburu ditu zapatuko ekitaldiak: batetik, azken hamarkadetako "Euskal Nazio Askapen Mugimenduko kideen aurka tortura sistematikoa erabili izan dela salatzea eta horren memoria egitea"; bestetik, emakumeen kasuan, indarkeria matxista politikoak eta sexu-torturak dituen berezitasunak kontatzea, eta "torturatua izan den kolektiboaren mina aitortu eta ez errepikatzeko gizartea inplikatu eta horretarako baldintzak sortzea".
Emuixonekin elkarlanean
Aramaioko Talde Feministak urteak daramatza "sistema patriarkal honen indarkeria mota ezberdinak ikusarazten". Azken urteetan, bereziki, ekofeminismoa lantzen aritu da, eta hain- bat ekintzatan hartu dute parte, hala nola Gasteizen, Bira Ekofeministan eta Arrasateko ekoekitaldian.
Emuixon taldean herriko hain- bat emakume daude, eta "musikak eta militantziak" elkartu dituzte: "Gure mezua zabaltzeko beste modu bat da".
Dantza eta mugimendu tailerra
Itur Zuri Elkarteak antolatuta, Emakumeak mugimenduan tailerra egingo dute domekan, 10:00etatik 13:00era, frontoiko gimnasioan. Oihane Vicentek gidatuko du. Plazak mugatuak dira, eta izena eman behar da 620 26 08 09 telefonoan. Elkartekideek lehentasuna izango dute. Prezioa: bazkideak, 10 euro; ez-bazkideak, 15 euro.